موشتولوق گلدی بویاز،گؤزله­دیگیم یارگله­جک

اَلینده نغمه­لی ساز ، بوخجاسیندا نار گله­جک

بیته­جک شاختا آیاز ، آغاجلارا بار گله­جک

من کیمی یوخسولونا، توکنمه­یَن وارگله­جک

نه ­بیلردیم یاریلا، اؤزگه بیر نیگار گله­جک

باغریمی اوزمک اوچون،گون­گئجه­دَن تارگله­جک

بیته­جک شاختا بوران،دوندوروجو قارگله­جک

دردیمی یایماق اوچون،دونیا منه دارگله­جک

» اؤزگور«

بو سون مکتوبومدور یازیرام سنه

بیلمیرم آغلیسان گولورسن منه

هر نیسه سئوگیمی باشا دوشمه دین

حسرتین یاندیریر قلبیمی یئنه

*

دئدین کی بئزمیسن سئوه بیلمیسن

منی خاطریندن داها سیلمیسن

دئ نه گورموشویدون سئوگیدن یانا

بللی کی سئوگیدن هئچ نه بیلمیسن

*

منی اونودورسان مین بیر هوسله

مین قرار وئریرسن هربیرنفسله

هانی بس دئدیگین کوورک اوره گین

منی آلداتمیسان بوش بیر قفسله

*

سئومیشم سئویرم سئوه جه یم من

پیس گونلری بیربیر گؤره جه یم من

منی اونوتساندا هئچ سئومه سنده

عشقینله کول اولوب اؤله جه یم من

*

دئییرسن اونودوم اونوتدوغون تک

دئییرسن دابس دیر باشیمدان ال چک

اونودماقدا سؤزیوخ اونودارام من

اما او زامان کی دوراجاق اوره گ

*

اتالار دئمیشلر چیخار یادیندان

هر کیمسه کی کئدسه سنین یانیندان

سن گئتدین یانیمدان اما یادیمدان

چیخمازسان روحومدا چیخسا جانیمدان

                                     اؤزگور 

 

دئمیشدیم اوره­گیم دئمیشدیم سنه

او گوزَل گؤزلری گؤروب  تَلَسمه 

اومودون  باغلاما  داغداکی  چنه

 هر سؤزلو باخیشا چیرپینیب اَسمه 

دئمیشدیم اوره­گیم اویما سئوگییه

گول کیمی قوخلاییب آتاللار سنی 

دئمیشدیم  تَلَسمه دایان  تکلیغه 

بو دوستلار بیر پولا ساتاللار سنی   

دئمیشدیم اوره­گیم ناغیلدی سئوگی   

ناغیل یامیاملاری  یییه جک سنی  

یئنی پالتار کیمی بیر نئچه گونلوک   

 بَیَنیب  رنگینی  گییه­جک  سنی  

آی یازیق اوره­گیم ائله سانیردین       

 بیر عؤمور اوره­گده­ن سئوه­جک سنی   

قوردوغون رویادا دوشونمه­میشدین 

اؤیدوگون آداملار  دؤیه­جک سنی 

اؤزگور        

گیزلیجه گؤروشدوک سئونلر کیمی

گول آلیب گول وئردیک سئوگی رسمینه

سن منه سؤز وئریب منه قلبیمی

گؤر نه­لر یاشادیق سئوگی ایمینه.

 

سانکی بیر یاساقمیش بیزیم سئوگیمیز

سئورکن سئومه­یی هر آن گیزله­دیک

ایفتیرا سؤزلره قیسقانخ گؤزلره

حق وئریب اوتوردوق زامان ایزله­دیک .

 

سئورکن قلبیمیز بیر دوستاق کیمی

ساخلادی سئوگینی هئچ بیراخمادی

دوستاقلی سئوگیمیز اؤزلمه دؤندو

او قیسقانج گؤزلرین یاشی آخمادی .

 

گؤر نه­یی ایتیردیک نه تاپدیق آنجاق

سئوگینی وئرمیشیک حسرت آلماغا

قورخولو سئوگیلر جزالاناجاق

سورونه سورونه دیری قالماغا .

 

سئوگیلیم دوشونکی سئومک حیسینی

من داندیم سن داندین کیمسه دانمادی

سیل گؤزون یاشینی آداملارا باخ

من یاندیم سن یاندین کیمسه یانمادی .

                                          اؤزگور

ائشیدمیشم توی شربتین ایچیبسن             

مندن گیزلی اؤزون کسیب  بیچیبسن             

ائشیدمیشم توی دونونو آلیبلار            

بارماغیوا قیزیل اوزوگ سالیبلار           

ایندی ندن نیسگیل­ایله باخیرسان          

گؤز یاشی تک باخیب منه آخیرسان           

حیس ائدیرم کی پئشمانسان بو­ایشدن            

راضی دئییل اوره­گین بو بیتیشدن         

سنسه ساندین منی یاددان آپارسان          

اؤز تاییندان یاخشیسینی تاپارسان          

دولاندیریب آتدی سنی یاخشیسی           

یاخشیسینا ساتدی سنی یاخشیسی           

چکدیغین تک قلم چکدی یاد آدان       

ایناندیغین داها دوشمورهئچ یادان

 ایندی گولوم سال یادینا سؤزلرین                   

گؤزیاشیما گولوب گئچن گؤزلرین                 

یادان گلیر آتما منی دییَردیم          

اؤزگه لره ساتما منی  دییَردیم             

اونوتدونمو اؤزدئدیغین سؤزلری            

یالانلاران اومودلانان گؤزلری             

آتدین منی آتان اَلین واراولسون       

اومما کؤنول دؤنوب سنه یاراولسون      

داها گؤزوم سنین یولون گؤزله میر       

بوینوم سنین قوللارینی ایزله میر       

گزدیغین یئر سیندیردیغین اوره­گدیر              

گووَندیغین یئره ده­یَن کوره­گدیر           

یورما اؤزون ارتیق اونوت سن منی       

چوخ زاماندیر اونوتموشام من سنی

من تاپمیشام اؤز یولومو آزمارام          

من سنه تای دوستا قویو قازمارام               

بوشعریمده سون­شعریمدیر سن ایچین          

بَیَندیغین ساتما منه دوز گئچین          

قیسمت اولارسنده­خوشبخت اولارسان

عؤمور بویو موتلولوغا دولارسان       

سن تویوزا چاغیرمادین بیزلری

اونوتموشام عؤمور بویو سیزلری        

گئت گؤزه­لیم سن آجیدان بوش یاشا          

اؤز یارینلا موتلو یاشا خوش یاشا

اؤزگورسنی سئوسَیدیده بیر زامان        

ایندی دانیر سئودیگینی هرزامان

                                      اوزگور                               

 

 

http://ozgur.blogfa.com/      بیر میللی شعریله یئنیلندی

 

 

سئوگی نَدیربیلیرمیسیز؟

               سئوینج آدین ائشیدمیسیز؟

یوخسا دئییبدیلر سیزه

 بو آنلام سیز یالان سؤزو

 بیر کره اولسا گؤرموسوز

 قان آغلایان یاشلی گؤزو

  سئوگی منیم

             سئوگی سنین 

سئوگی بیزیم

                               زهرله­نن سئوگیمیزین   

                                مین باخیشدا گؤردوم ایزین 

                                هوس دولو اؤره­گلرده

                               آرخاسی بوش دیره­کلرده

                                   یئره ده­ین کوره­کلرده

                                      اوزگور

 

بوندان سونرا تورکجه لیریک شعرلریم 

 http://www.sonduygu.blogfa.com/  وئبلاگینا 

    و

آنا یوردوم لا آنا دیلیمه گوره یازدیغیم تورکجه شعرلریم 

 http://ozgur.blogfa.com/  وئبلاگینا  یوکلنه جک

بوتون سایقیلارلا :اوزگور

dikləməni danload edmək üçün tıklayın

   şeır...özgür

   bəstəkar..murad gögabaxan

   dikləmə....özgür

http://www.4shared.com/file/43841449/5f8e00a6/_Qizil_Gul_httpwwwsonduygublogfacom.html